Astara rayonunun Şümrüd kəndinin sabiq bələdiyyə sədri, 1969-cu il təvəllüdlü Eynəli Əzizovun ötən ilin may ayında qətlə yetirilməsi hadisəsi ilə bağlı məhkəmə prosesi yekunlaşıb.

Publika.az xəbər verir ki, Lənkəran Ağır Cinayətlər Məhkəməsində keçirilən prosesdə hadisəni törədən 1996-cı il təvəllüdlü Aslan Şüvənəliyev Cinayət Məcəlləsinin 120.2.4-cü (xüsusi amansızlıqla adam ölürmə) maddəsi ilə təqsirli bilinib.

Məhkəmə istintaqı zamanı baş vermiş qətlin səbəbləri məlum olub. Hadisəni törədən A.Şüvənəliyev Eynəli Əzizovu bir neçə ildir tanıdığını bildirib. O, ailəsi ilə birgə Eynəliyə məxsus olan və yaylaqda yerləşən sahədə təsərrüfatla məşğul olub. Bəzi vaxtlar Eynəli də həmin təsərrüfata gələrək onlarla birgə qalıb.

Hadisə baş verən gün Aslan meşəyə sürünün arxasınca gedib. Bundan sonra Eynəli evdə körpə uşaqla birgə qalan Aslanın həyat yoldaşına nalayiq hərəkətlər edib. Bir qədər sonra Aslan geri qayıtdıqda arvadının ağladığını, üzünün qızardığını görüb və ondan hadisəni öyrənib. Bundan sonra balta götürən gənc oğlan Eynəlinin ardınca təsərrüfatdan çıxıb. O, Eynəlini yolun kənarında görərək səsləyib və yalandan sürüyə vəhşi heyvanın hücum etdiyini deyərək meşəyə tərəf gəlməsini istəyib. Sonra tərəflər arasında dava düşüb. Aslan balta ilə Eynəliyə zərbələr endirərək onu amansızlıqla öldürüb və meyitini meşədə basdırıb.

Hadisədən 1 gün sonra Eynəlini axtaran ailə üzvləri və digər şəxslər Aslana zəng etməyə başlayıblar. A.Şüvənəliyev isə Eynəlidən xəbərsiz olduğunu deyib. Hüquq-mühafizə orqanlarının işə qarışmasından sonra o, qətlə yetirdiyi şəxsi basdırdığı yeri göstərib.

Lənkəran Ağır Cinayətlər Məhkəməsinin hökmü ilə Aslan Şüvənəliyev 16 il müddətə azadlıqdan məhrumetmə cəzasına məhkum edilib.

Qeyd edək ki, qətlə yetirilən şəxs bələdiyyə sədri vəzifəsini tərk edəndən sonra kənd məktəbində texnologiya müəllimi kimi çalışırmış.

Turqut Seyidov