Rusiya prezidenti Vladimir Putin keçmiş sovet respublikalarının, İsrailin liderlərinə, həmçinin Gürcüstan və Moldova xalqlarına təbrik ünvanlayıb.

Qutb.az xəbər verir ki, bu barədə Kremlin mətbuat xidməti məlumat yayıb.

Bildirilib ki, Rusiya Prezidenti Vladimir Putin II Dünya Müharibəsində Qələbənin 80-ci ildönümü münasibətilə Azərbaycan, Ermənistan, Belarus, Qazaxıstan, Qırğızıstan, Tacikistan, Türkmənistan, Özbəkistan, İsrail liderlərinə, həmçinin Gürcüstan və Moldova xalqlarına təbrik məktubu göndərib. Eyni zamanda separatçı Abxaziya və Cənubi Osetiya liderləri də bu siyahıya daxil edilib.

Prezident vurğulayıb ki, ölkələr faşist işğalçılarına qarşı çiyin-çiyinə rəşadətlə vuruşan, arxa cəbhədə fədakarlıqla çalışan ata və babaların şərəfli əməllərinin, böyük fədakarlıqlarının xatirəsini müqəddəs şəkildə yad edirlər.

Putin müharibə veteranlarına və arxa cəbhə işçilərinə ürəkdən təbriklər və səmimi təşəkkür sözləri çatdıraraq, faşistlərin və onların əlaltılarının törətdikləri vəhşilikləri unutdurmaq üçün hər cür cəhdlərə son qoyulmasının vacibliyini qeyd edib.