Almaniyanın xarici işlər naziri Berbok bəyan edib ki, onun hökuməti "Eurofighter" təyyarələrinin Səudiyyə Ərəbistanına satışına qarşı olmayacaq. Berbok qərara səbəb kimi Səudiyyə Ərəbistanının husilərin raket zərbələrinə cavab verməsini göstərib.

Publika.az xəbər verir ki, Berbok bu açıqlamaları Qüdsdə İsrail prezidenti İsaak Hersoq və xarici işlər naziri Yisrael Katz ilə keçirdiyi görüşlərdən sonra verib.

O qeyd edib ki, Səudiyyə Ərəbistan Yəməndən husilər tərəfindən İsrailə atılan raketləri dayandırıb:

“Bu da İsrailin təhlükəsizliyinə və bölgədə atəşin yayılmasının qarşısını almağa töhfə verir. Almaniya hökuməti Britaniyanın Səudiyyə Ərəbistanına daha çox "Eurofighter" verməsi ideyasına qarşı çıxmayacaq. Husilərin regional təhlükəsizlik üçün yaratdığı təhlükənin fərqindəyik”.

Qeyd edək ki, Almaniya bundan əvvəl Səudiyyə Ərəbistanına silah satışına qarşı çıxmışdı. "Eurofighter" İngiltərə, İtaliya, Almaniya və İspaniyanın birgə layihəsi olduğundan, döyüş təyyarələrinin satışı üçün Almaniyanın da icazəsi lazımdır.

Aysel Şahmar