Türkiyədə nazirlər müxalifətçilərin "boykot" çağırışına cavab olaraq yerli sahibkarlara dəstək nümayiş etdiriblər.

Qutb.az TRT-yə istinadən xəbər verir ki, nazirlər müxtəlif ticarət məkanlarında alış-veriş edərək iqtisadiyyata zərbə vurmaq istəyənlərə cavab verdiklərini bildiriblər.

Ticarət naziri Ömər Bolat Ankarada alış-veriş edib və bunun milli iqtisadiyyata dəstək olduğunu vurğulayıb. O, Türkiyə iqtisadiyyatının 22 ildə 6,5 dəfə böyüdüyünü və bu inkişafın davam edəcəyini qeyd edib.

Daxili işlər naziri Ali Yerlikaya sosial media hesabında alış-veriş etdiyi görüntüləri paylaşıb, yerli istehsalın boykot edilməsini ölkənin və millətin əməyinə xəyanət adlandırıb.

Nəqliyyat və infrastruktur naziri Abdulkadir Uraloğlu sosial mediada alış-veriş edərkən çəkilmiş şəklini paylaşıb, İsraili dəstəkləyən brendlərə səssiz qalanların yerli məhsullara hücum etməsini qınayıb və milli brendləri dəstəklədiyini bildirib.

Gənclər və idman naziri Osman Aşkın Bak da alış-veriş etdiyini əks etdirən foto paylaşıb, Türkiyənin əməyi və alın təriyə dəyər verdiyini vurğulayıb.

Milli təhsil naziri Yusuf Tekin boykot çağırışlarını tənqid edərək, CHP-nin 2009-cu ildən bəri siyasi oyunların təsirində olduğunu qeyd edib. O, qızı ilə birlikdə bir kitab mağazasını ziyarət edərək uşaqlara kitablar hədiyyə edib.

Səhiyyə naziri Kemal Memişoğlu sosial media paylaşımında yerli istehsala dəstək mesajı verib və işçilərin, sahibkarların əməklərinə dəyər verdiklərini bildirib.

Bu addımlarla nazirlər "boykot" çağırışlarına etirazlarını açıq şəkildə ifadə etdilər.