"Azərbaycan və Qırğızıstan arasındakı münasibətlərin əsası ümummilli lider Heydər Əliyevin Qırğızıstana səfəri zamanı qoyulub. O vaxt "Manas" eposunun 1000 illiyi ilə bağlı Heydər Əliyev orada olmuşdu. İlham Əliyev də dəfələrlə Qırğızıstanda rəsmi səfərdə olub. Axırıncı dəfə isə 2022-ci ilin oktyabr ayında Qırğızıstana səfər etmişdi". 

Bu sözləri politoloq Cümşüd Nuriyev Azərbaycan Qırğızıstan münasibətlərini Qütb.az-a şərh edərkən söyləyib. Onun sözlərinə görə, Azərbaycan-Qırğızıstan münasibətləri çox yüksək səviyyədədir: 

"Ceyhun Bayramovun Qırğızıstanda səfərdə olması, geniş şəkildə görüş keçirməsi və Azərbaycan-Qırğızıstan arasında olan mövzuların müzakirəsi gözlənilən idi. Çünki Azərbaycan da, Qırğızıstan da Türk Dövlətləri Təşkilatında (TDT) təmsil olunur və bu təmsilçilik çox yüksək səviyyədədir. Azərbaycan-Qırğızıstan münasibətləri o çərçivədən başqa ikitərəfli münasibətlər də çox yaxşı səviyyədədir. Azərbaycan ziyalıları Bişkekə səfər edir. Orada Azərbaycanla bağlı çoxsaylı materiallar dərc olunub. Qırğızıstanda Türkdilli Dövlətlərə Dəstək Fondunun xətti ilə Azərbaycan mədəniyyət və incəsənətinin Qırğızıstana təbliği, Qırğızıstan mədəniyyət və incəsənətinin Azərbaycana təbliği çox yüksək səviyyədə həyata keçirilir. Azərbaycan-Qırğızıstan münasibətləri hazırda bu istiqamətdə inkişaf edir. Azərbaycan Qırğızıstana sərmayə qoymaq istəyir. Qırğızıstan da Azərbaycanda bəzi işlər görmək istəyir. Azərbaycan Qırğızıstana kənd təsərrüfatı sahəsində, turizm sahəsində münasibətləri yeni məcraya yönəldir. Təbii ki, xarici siyasət sayəsində yeniliklər var. Və bütün bunların əsas məqsədi Azərbaycan-Qırğızıstan münasibətlərini yeni müstəviyə keçirmək və burda hər iki ölkənin maraqlarına uyğun olan addımlar atmaqdır".